Saudando ao Entroido

2011-03-03T01:21:00.022+01:00

Aínda non chegaron os días grandes de Entroido e as Pantallas, eses demos limiáns, vixiantes e amoladores dos paseantes sen disfraz, elegantes coas súas brancas camisas e calzóns, cos seus relucintes zapatos, coa súa vermella faixa e engalanadas coas súas coloridas capas, tomarón as rúas de Xinzo, anunciando a chegada do Entroido, ao son das súas vexigas e dos seus axóuxeres e campás.

Ao tempo en Verín os Cigarróns garbosos coas súas puntillas seguindo o tintinear das súas chocas tampouco puideron esperar, decidiron saúdar aos seus veciños, aos que ataviados co seu vergallo amonestaron un ano máis, avisándolles que tomarán o poder da vila nos próximos días.

Tampouco as Madamás e os Galáns de Cobres, elegante e minuciosamente ataviados se resistiron a sair as rúas das parroquias de Vilaboa, rendendo culto á beleza e facendo da danza un arte cheo de música e cor.

E en breve os Peliqueiros tomarán as rúas de Laza, os Felos as de Maceda, os Boteiros as de Vilariño de Conso, os Xenerais as de Boqueixón… e as ancestrais tradicións do Entroido Galego estarán presentes nas rúas celebrando o fin dos longos e duros días de inverno, mentres enchemos as nosas mesas de cachuchas e lacóns, de grelos e patacas, de orellas e filloas antes de chegar ao período de abstinencia carnal que suporá a coresma a partir do mércores de cinsa.

En poucos días, a festa pagana que é o Entroido chegará a tódalas vilas de Galicia; anuncianse días de festa na que se poden romper tódalas normas, días nos que os galegos convertiremos o Entroido na festa máis irreverente do noso calendario, días nos que mudaremos o noso rostro e trocaremos a nosa rutina por unha irónica función da que todos participaremos con humor, enxeño e cor, no que cada acontecemento sirve para poñer do revés a monotonía da nosa vida cotiá.

Todas estas tradiccións e manifestacións culturais son merecedoras dunha sede digna, na que ser recollidas e compartidas para que sexa accesible para todos os galegos, é por esto que os Amig@s do Museo Galego do Entroido lle esiximos ás Administracións a implicación necesaría para potenciar e concluir un fermoso e ambicioso proxecto que os poderes públicos decidiron deixar horfo.

Nace a Asociación Amig@s do Museo Galego do Entroido

2011-01-31T23:36:00.011+01:00

En maio de 2.003 na vila de Xinzo de Limia, o Museo Galego do Entroido daba os seus primeiros pasiños, eran pasiños pequenos pero daban resposta a unha das maiores inquedanzas de todos os limiáns, a de contar cun espazo que dera cabida á totalidade da realidade festiva e antroplóxica de tódolos entroidos de Galicia.

A ilusión dos que pensabamos que en Xinzo comezaba unha nova etapa cultural e que este feito era o inicio dun ambicioso museo, morreu aos poucos meses ao encontrarnos de fronte coa dura realiade, a que supuxo a paralización e a perda de interese das Administracións Públicas no proxecto. As nosas esperanzas de culminar o noso museo esvaecéronse e o fermoso proxecto do Museo Galego do Entroido difuminouse no tempo, e a día de hoxe so queda unha placa na súa fachada, a xeito mortuorio.

A realidade oito anos despois de comezar este proxecto é que as Administracións Públicas esquecerónse de que o pobo de Xinzo quere ao seu Museo, ao Museo Galego do Entroido, afortunadamente os limiáns somos xente tozuda e colectivamente loitaremos para que se revitalice na vila o museo da nosa festa.

Ante esta difícil realidade un grupo de veciños e veciñas inconformistas e diferentes colectivos sociais, políticos e culturais, animados pola Asociación Cultural A Pantalla decidimosxuntarnos, nace así a Plataforma de Amig@s do Museo Galego do Entroido, na que cada día esperamos ser máis os que nos movilizemos para culminar este ambicioso proxecto.

Amigos do Museo Galego do Entroido

Saudando ao Entroido

Nace a Asociación Amig@s do Museo Galego do Entroido